Rekstur orkuvera HS Orku var stöðugur á árinu 2025 þrátt fyrir jarðhræringar og eldsumbrot. Framkvæmdum við stækkun og endurbætur Svartsengisvirkjunar lauk á tilskildum tíma og í samræmi við áætlanir. EBITDA ársins hefur aldrei verið hærri og skapar fjárhagslegur styrkur fyrirtækisins traustan grunn fyrir áframhaldandi vöxt samhliða auknum fjárfestingum í sjálfbærri orkunýtingu.
Heildartekjur ársins námu um 15,7 milljörðum króna og aukast um 8% á milli ára. Munar þar mestu um aukna raforkusölu á almennum markaði, til stórnotenda og í heildsölu. Fjárhagsstaða félagsins er sterk og nam eigið fé 37 milljörðum í árslok. Eiginfjárhlutfall félagsins er 42%.
Tómas Már Sigurðsson, forstjóri, er stoltur af árangrinum og segir rekstrarárið 2025 vera það besta í sögu HS Orku:
„Við náðum stórum áfanga í uppbyggingu fyrirtækisins þegar sjöunda orkuverið í Svartsengi var tekið í notkun í samræmi við allar áætlanir og þrátt fyrir ýmsar áskoranir náttúrunnar, áskoranir sem við höfum væntingar um að séu senn að baki. Þessi góða rekstrarniðurstaða gefur okkur byr í seglin fyrir áframhaldandi vöxt fyrirtækisins.“
Lykiltölur úr samstæðureikningi
Heildartekjur námu 15,7 milljörðum og hækka um 1,1 milljarð (8%) á milli ára. Rekstrargjöld voru um 12,3 milljarðar og hækka um 336 milljónir frá árinu 2024. Hækkun rekstrargjalda skýrist að miklu leyti af viðhaldi virkjana HS Orku.
EBITDA var 6.499 milljónir króna árið 2025 samanborið við 5.493 milljónir árið áður og hækkar því um 18% á milli ára.
Hagnaður fyrir skatta nemur 4.608 milljónum króna samanborið við tap upp á 610 milljónir á árinu 2024. Sveiflur í hagnaði fyrir skatta á milli ára skýrast aðallega af hagstæðum gengismun fjármagnsliða á árinu 2025 samanborið við gengistap á árinu 2024.
Heildareignir félagsins voru 89,6 milljarðar í lok árs og aukast um 11% milli ára.
Fjárhagsstaða félagsins er sterk og nam eigið fé 37,5 milljörðum króna í árslok.
Eiginfjárhlutfall er 42% en 49% að meðtöldu víkjandi láni frá hluthöfum. Ekki var greiddur út arður á árinu en óráðstafað eigið fé lækkaði um 286 milljónir vegna hlutafjárlækkunar á árinu 2025.
Stækkuð og endurbætt Svartsengisvirkjun og rannsóknarboranir við Sveifluháls
Ný 55 MW vélasamstæða var formlega tekin í notkun í jarðvarmavirkjuninni í Svartsengi þann 1. desember 2025. Þrátt fyrir ýmsar tafir á verktíma vegna jarðhræringa og eldsumbrota stóðust tíma- og kostnaðaráætlanir framkvæmdarinnar. Með aukinni afkastagetu Svartsengisvirkjunar skapast tækifæri til að auka orkuframleiðslu í virkjuninni í samræmi við gildandi virkjunarleyfi á svæðinu en leyfið miðast við 85 MW.
Stækkun Svartsengisvirkjunar er hluti af umfangsmikilli uppbyggingu innviða HS Orku síðustu sex ár. Reykjanesvirkjun var stækkuð um 30 MW, lokið var við byggingu 10 MW vatnsaflsvirkjunar að Brú í Biskupstungum og fjárfest var í Fjarðarárvirkjunum í botni Seyðisfjarðar. Fleiri stór þróunarverkefni eru í undirbúningi jafnt í jarðvarma sem vatnsafli.
Undirbúningur er hafinn fyrir nýtingu jarðvarma í Eldvörpum í næsta nágrenni við Svartsengi en þar var fyrst borað eftir jarðvarma árið 1983. Stefnt er að því að flytja orku sem fæst úr
Eldvörpum til vinnslu í endurbættri Svartsengisvirkjun.
Fyrsta djúpa rannsóknarborholan við Sveifluháls á Krýsuvíkursvæðinu var boruð sumarið 2025 og fleiri rannsóknarholur eru í bígerð á árinu 2026. Frekari rannsóknir eru forsenda þess að unnt sé að leggja mat á nýtingarmöguleika svæðisins til framtíðar. Unnið er að leyfismálum og frekari undirbúningi verkefnisins á grundvelli rannsóknar- og nýtingarsamnings við Hafnarfjarðarbæ.
Undirbúningur 55 MW Hvalárvirkjunar í Ófeigsfirði á Ströndum og fleiri vatnsaflsverkefna á Vestfjörðum heldur áfram í gegnum dótturfélag HS Orku, VesturVerk.
Helstu niðurstöður úr ársuppgjöri samstæðu
Fjármagnsliðir setja verulegt mark á afkomu félagsins milli ára. Í stórum dráttum skýrist breytingin af hagstæðum gengismun að fjárhæð 2.345 milljónir króna á árinu 2025 samanborið við gengistap að fjárhæð 70 milljónir króna árið áður. Þrátt fyrir auknar lántökur samhliða framkvæmdum í Svartsengi lækkuðu nettó fjármagnsgjöld um 551 milljón króna á milli ára vegna styrkingar krónunnar gagnvart Bandaríkjadal, en lán HS Orku eru að mestu í USD og EUR. Nettó fjármagnsgjöld voru 2.095 milljónir 2025 en 2.646 milljónir 2024.
Fastafjármunir jukust um 10,6 milljarða á milli ára sem skýrist aðallega af nýfjárfestingum vegna stækkunar Svartsengisvirkjunar auk holuborana á Reykjanestá. Veltufjármunir drógust saman um 1,5 milljarð sem skýrist að mestu af lækkun handbærs fjár vegna framkvæmda í Svartsengi.
Vaxtaberandi skuldir framkvæmdalána hækkuðu um 1,9 milljarða á milli ára og skýrist hækkunin að mestu af stækkun og endurbótum á Svartsengisvirkjun.
Sjálfbærniskýrsla HS Orku 2025
Samhliða útgáfu ársreiknings gefur HS Orka út sjálfbærniskýrslu fyrir árið 2025. Skýrslan geymir margvíslegar upplýsingar um starfsemi og ytri áhrif fyrirtækisins á liðnu ári og ljósi er varpað á fjölbreytt verkefni þess. Upplýsingagjöfin byggir á Voluntary Sustainability Reporting Standards (VSME) og tekur jafnframt mið af viðeigandi kröfum European Sustainability Reporting Standards (ESRS) fyrir brýn málefni, til samræmis við niðurstöður tvöfaldrar mikilvægisgreiningar sem framkvæmd var árið 2025.
Ýmsar viðurkenningar
HS Orka gekkst á árinu 2025 undir heildstætt sjálfbærnimat alþjóðlega matsfyrirtækisins EcoVadis í annað sinn og viðheldur gullvottun sinni. Niðurstöðurnar staðsetja HS Orku í hópi efstu 5% fyrirtækja á heimsvísu. Auk þess hlaut undirbúningur Hvalárvirkjunar, verkefni VesturVerks, dótturfélags HS Orku, alþjóðlega gullvottun Hydropower Sustainability Alliance eftir ítarlegt sjálfbærnimat erlendra matsmanna.
Afhendingaröryggi og uppbygging
Í sjálfbærniskýrslunni er gerð grein fyrir helstu aðgerðum HS Orku til að tryggja afhendingaröryggi raforku og vatns í ljósi áframhaldandi jarðhræringa á Reykjanesskaga. Sérstök áhersla er lögð á stækkun og endurbætur Svartsengisvirkjunar þar sem ný og aflmikil vélasamstæða var gangsett í lok árs. Einnig er greint frá umfangsmiklum rannsóknarborunum á Krýsuvíkursvæðinu og undirbúningi jarðhitanýtingar í Eldvörpum með tengingu við Svartsengi. Einnig er fjallað um þróun viðbragðskerfa og samstarf HS Orku við almannavarnir, dreifiveitur og aðra viðbragðsaðila vegna náttúruvár og annarra ógna.
Álitamál tengd losun koltvísýrings
Í sjálfbærniskýrslunni er ljósi varpað á það hvernig jarðhræringar á Sundhnúksgígaröðinni hafa haft áhrif á rekstur orkuveranna og leitt til aukningar á því magni koldíoxíðs sem fer í gegnum vinnslurásir Svartsengisvirkjunar. Mælingar sýna skýrt samhengi milli þessara náttúrulegu ferla og aukinnar losunar koldíoxíðs á jarðhitasvæðum. Skýrslan undirstrikar því mikilvægi þess að skilja og vakta náttúrulega losun sem tengist jarðvarmaauðlindum.
Í skýrslunni er fjallað um brýn álitamál varðandi losun koldíoxíðs frá jarðhitasvæðum og meðhöndlun þeirrar losunar í kolefnisbókhaldi. Samhliða er bent á áhrif núgildandi regluverks á möguleika til hagnýtingar koldíoxíðs í orkuskiptaverkefnum, meðal annars til framleiðslu rafeldsneytis.
Stjórn HS Orku
Á aðalfundi 28. apríl 2026 voru endurkjörin í stjórn þau Adrian Pike, stjórnarformaður, Bjarni Þórður Bjarnason, varaformaður, Heike Bergmann, meðstjórnandi og Margrét Ormslev Ásgeirsdóttir, meðstjórnandi. Til vara voru kosin Gunnar Jóhannsson, Margrét Sveinsdóttir, Olli Mononen og Abby Tsai.
