HS Orka mun eiga góðan hóp fulltrúa á World Geothermal Congress 2026 sem fram fer í Calgary í Kanada í næstu viku, 8.-11. júní. Alls sækja sex starfsmenn úr hópi sérfræðinga fyrirtækisins ráðstefnuna að þessu sinni en hún er sú stærsta sinnar tegundar í heiminum.
Okkar fólk tekur virkan þátt í ráðstefnunni en Lárus Þorvaldsson, yfirforðafræðingur, flytur erindi um vöktunarkerfi vegna eldgosa, Lilja Magnúsdóttir, framkvæmdastjóri auðlinda, stýrir m.a. pallborðsumræðum í vinnustofunni Our Climate Future, Björk Þórarinsdóttir, framkvæmdastjóri fjármála, tekur þátt í lokuðu hringborði um fjármögnun jarðvarmaverkefna og Alma Gytha Huntingdon-Williams, verkefnastjóri í auðlindastýringu, er meðstjórnandi í einni af vinnustofum ráðstefnunnar.
Aðrir fulltrúar HS Orku á þinginu verða Ásbjörn Blöndal, verkefnastjóri og fyrrverandi framkvæmdastjóri auðlindasviðs og Lárus Guðmundsson, sérfræðingur framkvæmda.
Í erindinu Harnessing Geothermal Infrastructure for Volcanic Early Warning mun Lárus Þorvaldsson fjalla um það hvernig nýta má borholur og vöktunarkerfi til að efla eldgosavöktun og styrkja viðvörunarkerfi vegna náttúruvár.
Lilja Magnúsdóttir tekur þátt í vinnustofunni Our Climate Future, þar sem hún stýrir pallborðsumræðunum Deep, Disruptive and Defining: Next Generation Geothermal. Þá tekur hún einnig þátt í pallborðinu Geothermal Pathways: From Vision to Bankability, þar sem fjallað verður um hvernig þróa má jarðhitaverkefni frá fyrstu hugmyndum yfir í fjármögnunarhæf og framkvæmanleg verkefni.
Alma Gytha Huntingdon-Williams er meðstjórnandi (co-host) vinnustofunnar IEA Gas Management Task Force. Þar verða kynntar fyrstu niðurstöður alþjóðlegs samstarfsverkefnis sem beinist að því hvernig losun frá jarðhitavirkjunum er vöktuð, mæld og skráð, auk þess sem fjallað verður um leiðir til að bæta þessi ferli.
Við hvetjum ráðstefnugesti til að hitta fulltrúa HS Orku á WGC og fræðast nánar um starfsemi fyrirtækisins og þau fjölbreyttu jarðhitaverkefni sem starfsfólk fyrirtækisins vinnur að. HS Orkufólk verður meðal annars aðgengilegt á bás Green by Iceland kl. 9:00 á þriðjudagsmorgun, 9. júní.
