HS Orka hefur birt sjálfbærniskýrslu sína fyrir árið 2025 þar sem meðal annars er fjallað um áhrif jarðhræringa á Reykjanesskaga, afhendingaröryggi orku, umfangsmikil þróunarverkefni og stuðning fyrirtækisins við samfélagið.
Órofinn rekstur þrátt fyrir eldgos
Fram kemur í skýrslunni að árið hafi einkennst af áframhaldandi jarðhræringum á Reykjanesi og eldgosum á Sundhnúksgígaröðinni. Þrátt fyrir krefjandi aðstæður hafi tekist að halda uppi órofnum rekstri og áframhaldandi uppbyggingu.
Metnaðarfull þróunarverkefni HS Orku
Meðal stærstu verkefna ársins var gangsetning nýrrar 55 MW vélarsamstæðu í Svartsengisvirkjun, sem er stærsti gufuhverfill landsins. Þá hófust einnig djúpar rannsóknarboranir við Sveifluháls á Krýsuvíkursvæðinu sem marka fyrsta áfanga í frekari rannsóknum á mögulegri orkunýtingu svæðisins.
Áhrif jarðhræringa á losun
Í skýrslunni kemur jafnframt fram að jarðhræringar hafi haft veruleg áhrif á losun gróðurhúsalofttegunda frá Svartsengisvirkjun þar sem koldíoxíð úr kviku leitar í gegnum virkjunina í Svartsengi. Heildarlosun frá vinnslurásum Svartsengis og Reykjanesvirkjunar nam rúmlega 144 þúsund tonnum af CO2-ígildum árið 2025 og er skýrt samhengi milli aukinnar jarðvirkni og aukins magns koldíoxíðs úr vinnslurásum virkjunarinnar.
Þessi þróun vekur upp mikilvægar spurningar um hvernig náttúruleg losun frá jarðhitasvæðum skuli metin í landsbókhaldi Íslands og í regluverki sem snýr að loftslagsmálum og orkuskiptum.
Stuðningur við rannsóknir og nærsamfélagið
Einnig er fjallað um samfélagsstuðning fyrirtækisins á árinu. Fyrsta úthlutun úr nýjum Rannsóknasjóði HS Orku fór fram árið 2025 en markmið sjóðsins er að efla þekkingu innan fyrirtækisins og stuðla að framförum í starfseminni og tengdum geirum. Þá var áfram úthlutað úr Samfélagssjóði HS Orku, bæði að vori og hausti, og segir í skýrslunni að metfjöldi umsókna hafi borist víðs vegar af landinu.
Auk sjóðanna styrkti fyrirtækið fjölmörg samfélagsverkefni og viðburði á árinu, þar á meðal íþróttafélög í nærsamfélögum sínum, Heimsþing kvenleiðtoga í Reykjavík og alþjóðlegu jarðhitaráðstefnuna Iceland Geothermal Conference.
Gullvottun í annað sinn
Á árinu 2025 gekkst HS Orka í annað sinn undir heildstætt sjálfbærnimat EcoVadis og viðhélt gullvottun sinni. Niðurstöðurnar staðsetja HS Orku í hópi efstu 5% fyrirtækja á heimsvísu.
