Nýr raforkusamningur Norðuráls og HS Orku, um afhendingu á 50 megavöttum af raforku fyrir starfsemi álvers Norðuráls á Grundartanga, tekur gildi í dag 1. október. Samningurinn var undirritaður síðastliðið haust og gildir út september 2031.
Nýr samningur markar mikilvægan áfanga í samstarfi fyrirtækjanna en Norðurál hefur keypt raforku frá HS Orku allt frá því að álverið hóf starfsemi árið 1998.
Tómas Már Sigurðsson, forstjóri HS Orku: „Norðurál hefur verið einn mikilvægasti viðskiptavinur HS Orku í rúm 25 ár og það er mjög ánægjulegt að ná saman um áframhaldandi samstarf. Raforkunotkun Norðuráls hentar vel framleiðslu á raforku frá jarðvarmavirkjunum þar sem orkunotkun er stöðug og fyrirsjáanleg. Með þessum samningi er hafin ný vegferð inn í framtíðina sem án efa mun efla fyrirtækin til góðra verka.“
Gunnar Guðlaugsson, forstjóri Norðuráls: „Það er ánægjulegt að nýr raforkusamningur sé í höfn. Fyrirsjáanleiki og öruggt aðgengi að endurnýjanlegri raforku er grundvöllurinn í okkar rekstri og þess vegna skiptir afar miklu máli að eiga trausta samstarfsaðila eins og HS Orku. Samstarf fyrirtækjanna hefur verið afar gott undanfarna áratugi, allt frá stofnun Norðuráls, en með endurnýjanlegri raforku frá HS Orku framleiðum við umhverfisvænasta ál í heimi. Ég er sannfærður um að nýr samningur muni styrkja enn frekar samstarf fyrirtækjanna til framtíðar.“
HS Orka á og rekur fimm virkjanir, tvær jarðvarmavirkjanir á Reykjanesskaganum og þrjár vatnsaflsvirkjanir sem eru staðsettar á Suðurlandi, Austurlandi og Vesturlandi. Fleiri virkjunarkostir víða um land eru til skoðunar hjá fyrirtækinu og er þróun þeirra komin mislangt á veg.
Norðurál er eitt stærsta iðnfyrirtæki landsins og einn af stærstu kaupendum íslenskrar raforku. Raforkuna nýtir fyrirtækið að langstærstum hluta til að vinna hreint ál úr áloxíði í álverinu á Grundartanga og framleiða ál og álblöndur fyrir alþjóðamarkað. Norðurál hefur náð góðum árangri við að takmarka losun gróðurhúsalofttegunda, minnka sóun og bæta nýtingu hráefna. Notkun umhverfisvænna orkugjafa skiptir því sköpum, en skýr umhverfisvitund gegnir lykilhlutverki á öllum stigum framleiðslunnar.
