Í gær var undirritaður í Reykjavík samstarfssamningur milli Grænafls á Siglufirði og suður-kóreskra aðila um samstarf sem miðar að því að rafvæða íslenska strandveiðiflotann. HS Orka og Rafal eru einnig þátttakendur í verkefninu en hlutverk HS Orku verður að byggja upp hleðsluinnviði fyrir flotann og síðar selja raforku til dagróðrabáta í höfnum landsins.
Tímamót í tvennum skilningi
Dagurinn í gær markaði tímamót í verkefninu sem nú er komið af undirbúningsstigi og yfir á framleiðslustig en Grænafl hefur unnið að undirbúningi þess um tveggja ára skeið. Friðrik Friðriksson, framkvæmdastjóri sölu og þjónustu hjá HS Orku, fagnar áfanganum sem náðist í gær. Hann segir verkefnið vera upphafið að nýjum kafla í orkuskiptum landsins og mörg spennandi og áhugaverð verkefni bíði við rafvæðingu flotans.
Siglfirskur bátur verður upphafið
Samstarfið við Suður-Kóreumenn felur í byrjun í sér þróun og breytingu á íslenskum fiskibáti frá Siglufirði, Oddverja SI frá, og gera áætlanir ráð fyrir að hann verði kominn í notkun næsta sumar. Fjármagn hefur verið tryggt til þess að hefja framleiðslu bæði á Íslandi og í Suður-Kóreu.
Haft er eftir Kolbeini Óttarssyni Proppé, framkvæmdastjóra Grænafls að enn vanti nokkuð upp á hleðsluinnviði við hafnir landsins en nægt rafmagn sé til staðar til þess að anna orkuskiptum flotans. Orkuskipti strandveiðiflotans hér á landi gætu sparað losun á tugum þúsunda tonna af koltvísýringi.
HS Orka virkur þátttakandi í orkuskiptunum
Haustið 2024 skrifuðu HS Orka og Grænafl undir samstarfssamning um uppsetningu hleðslustöðva fyrir minni fiskiskip og vinnu að orkuskiptum. Hluti af vinnu Grænafls við að stuðla að orkuskiptum í minni fiskiskipum er að koma upp hleðslustöðvum fyrir dagróðrabáta í höfnum víða um land. HS Orka og Grænafl vinna sameiginlega að því verkefni en styrkur fékkst á sínum tíma úr Orkusjóði til þess.
HS Orka hefur tekið virkan þátt í orkuskiptum með uppsetningu hraðhleðslustöðva fyrir rafbíla um allt land í samstarfi við InstaVolt auk þess að bjóða fyrirtækjum og einstaklingum lausnir fyrir hleðslu rafbíla heima fyrir á hagstæðum kjörum.
