Árlega tekur HS Orka á móti hópi erlendra nemenda sem stundar nám í Jarðhitaskóla GRÓ, þekkingarmiðstöð þróunarsamvinnu, en skólinn starfar undir merkjum UNESCO. Heimsóknin er mikilvægur liður í námi nemendanna sem dvelja að jafnaði á Íslandi í hálft ár til að fræðast um nýtingu jarðvarma.
Jarðhitaskólinn hefur verið starfræktur hér á landi samfellt í 48 ár og á þeim tíma hefur skólinn miðlað þekkingu Íslendinga á jarðhita til mörg hundruð nemenda frá ýmsum þróunarríkjum, einkum Afríkuríkjum.
Nýjasta orkuverið skoðað
Hópurinn sem kom í heimsókn til okkar á dögunum taldi um 30 nemendur en það var Lárus Þorvaldsson, yfirforðafræðingur, sem flutti fyrirlestur um HS Orku og sá síðan um leiðsögn; fyrst um Svartsengisvirkjun, þar sem nýjasta orkuverið okkar var skoðað, og síðan í Reykjanesvirkjun.
Sýnatökur og kennsla
Nemendurnir fá einnig árlega sérhæfða kennslu í því hvernig taka á sýni á háhitasvæðum, bæði úr borholu og gufuauga, og fór sú kennsla nýverið fram við borholur okkar í grennd við Reykjanesvirkjun. Þessu til viðbótar hefur Yngvi Guðmundsson, framkvæmdastjóri þróunar og framkvæmda, um árabil sinnt kennslu á námskeiðum skólans í þróun verkefna í jarðhita.
Með þátttöku sinni í og liðsinni við verkefni Jarðhitaskólans leggur HS Orka þannig lóð á vogarskálarnar við útbreiðslu á þeirri einstöku og miklu þekkingu á jarðvarma og nýtingu hans sem Íslendingar búa yfir.
