Reykjanesvirkjun

Raforkuframleiðsla í Reykjanesvirkjun hófst í maímánuði árið 2006. Vél 1 var tekin í notkun um miðjan maí og vél 2 í lok sama mánaðar. Hönnun orkuversins er með þeim hætti að því er almennt stjórnað með fjargæslu frá stjórnstöð í Svartsengi. 

Orkuverið á Reykjanesi samanstendur af þremur tvístreymishverflum, tveir 50 MW og einn 30 MW, með sjókældum eimsvölum. Slíkt kerfi var nýjung á Íslandi á þeim tíma þegar virkjunin var reist. Stærri hverflarnir nota samtals 4000 lítra á sekúndu í aðskildum dælukerfum, sem er álíka mikið rennsli og meðalrennsli Elliðaánna. Þriðja vélin, sem er 30 MW, hagnýtir jarðsjó sem fellur til við vinnslu hinna tveggja og því var ekki þörf á að bora holur vegna tilkomu hennar.

Kælisjórinn frá Reykjanesvirkjun er fullnýtt auðlind og  skólabókardæmi um það hvernig auðlindastraumar við jarðvarmanýtingu geta stuðlað að hringrásarhagkerfi. Þegar eimsvalarnir hafa verið kældir með sjó rís hitastig kælisjávarins frá 8-10 gráðum upp í 30-33 gráður. Sú afurð nefnist ylsjór og er leidd í nærliggjandi landfiskeldi. Gerir hún fyrirtækjum meðal annars kleift að rækta hlýsjávartegundir sem að öðrum kosti er ekki hægt að rækta á norðurhveli jarðar.  

Iðnvarmaveita er einnig rekin við Reykjanesvirkjun en varmi frá virkjuninni er leiddur í lokuðu varmaveitukerfi til nærliggjandi fyrirtækja sem nota varmann til þurrkunar á fiskafurðum.  
HS Orka á um 50 hektara af iðnaðarlóðum við Reykjanesvirkjun. Þær hafa verið deiliskipulagðar og eru til reiðu fyrir uppbyggingu ýmiskonar iðnaðar sem fallið gæti að starfsemi Auðlindagarðs HS Orku.