Brúarvirkjun

Brúarvirkjun var gangsett árið 2020. Uppsett afl virkjunarinnar er 9,9 MW og er hún fyrsta vatnsaflsvirkjunin í eigu og rekstri HS Orku. Virkjunin er rennslisvirkjun í efri hluta Tungufljóts í Biskupstungum í þeim hluta árinnar sem rennur milli jarðanna Haukadals II og Brúar - ofan við þjóðveginn að Gullfossi.

Umfang Brúarvirkjunar er tiltölulega lítið og staðsetning heppileg með tilliti til sjónrænna áhrifa. Aðalstífla virkjunarinnar liggur þvert yfir farveg Tungufljóts rétt ofan við ármót Stóru-Grjótár. Þaðan er áin leidd í um 1700 metra löngum aðrennslisgöngum neðanjarðar að stöðvarhúsi.  

Brúarvirkjun er beintengd við dreifinetið í Bláskógabyggð og nágrenni og hefur virkjunin þannig haft jákvæð áhrif á afhendingaröryggi raforku fyrir byggð á svæðinu.