Dregið hefur úr hraunflæði úr Sundhnúksgígum síðasta sólarhringinn og framleiðsla á heitu og köldu vatni í orkuverinu í Svartsengi hefur gengið eðlilega fyrir sig allt frá því að eldgos hófst á miðvikudagskvöld. Öflugt samstarf viðbragðsaðila hefur eflt varnir innviða í Svartsengi enn frekar.
Um tíma í gær leit út fyrir að innviðir væru í hættu en staðan er mun betri núna. Engin raforkuframleiðsla er þó í Svartsengi þar sem Svartsengislína Landsnets er enn úti vegna skemmda af völdum hraunrennslis og því ekki hægt að framleiða raforku inn á meginflutningskerfið.
Unnið hefur verið að því að hækka varnargarða í grennd við þann hluta Njarðvíkuræðarinnar sem liggur innan varnargarðanna og hefur lögnin verið fergjuð þar að hluta af þeim sökum. Hraunkæling við lögnina hefur einnig gefið góða raun. Njarðvíkuræðin flytur heitt vatn frá Svartsengi að Fitjum í Reykjanesbæ og þjónar um 32.000 íbúum.
Heitavatnsframleiðslan í Svartsengi hefur verið sögulega mikil síðustu daga sem skýrist helst af því að kalt hefur verið í veðri að undanförnu auk þess sem byggð fer ört vaxandi á Suðurnesjum.
Þær lagnir HS Orku sem liggja undir nýju hrauni, bæði heitavatns- og kaldavatnslagnir, eru að standast álagið undir hrauninu vel og ekki verður vart hitabreytinga í þeim.
Framkvæmdir við varnir Njarðvíkuræðarinnar hófust fyrst fyrir réttu ári síðan og var stór hluti hennar þegar kominn í jörðu þegar hraun úr þriðja eldgosinu á Sundhnúksgígum flæddi yfir hana á litlum kafla í febrúar. Því tók aðeins um fimm daga að koma lögninni aftur í gagnið – aðgerð sem hefði tekið umtalsvert lengri tíma ef ekki hefði verið búið að verja lögnina að stærstum hluta.
