HS Orka fékk heildareinkunnina 76/100 í matinu og einkunnina EcoVadis Gold sem jafngildir gullvottun. Það þýðir að fyrirtækið er í hópi þeirra 5% fyrirtækja sem koma best út í mati EcoVadis á heimsvísu en þar er um að ræða yfir 150 þúsund fyrirtæki.
Styrkleikar og tækifæri til framfara
Samkvæmt mati EcoVadis kemur fram að styrkleikar HS Orku í sjálfbærni liggja einkum á sviði umhverfismála og vinnuverndar/mannréttinda. Stefnum og markmiðum er vel fylgt vel eftir með skýrum aðgerðum í þágu umhverfis- og öryggismála, vinnuverndar og eflingar mannauðs.
Meðal annarra atriða sem eru tiltekin í matinu og teljast HS Orku til tekna eru gæðavottanir og staðlar sem stjórnkerfi fyrirtækisins byggir á, staðfestingar þriðja aðila á ófjárhagslegum upplýsingum og lífsferilsgreiningar á loftslagsáhrifum virkjana.
Í matinu er jafnframt bent á ýmis tækifæri til framfara. Bent er á að auka megi skýrleika og sértækni í stuðningsstefnum, markmiðum og aðgerðum. Einnig er bent á að skýra megi markmiðasetningu í loftslagsmálum enn frekar og samræma við alþjóðleg viðmið.
Sjálfbærnimat á birgjum HS Orku
Virðiskeðja HS Orku teygir anga sína víða, bæði innanlands og utan. Hundruð birgja útvega HS Orku mikilvægar og oft sérhæfðar vörur og þjónustu sem gerir verðmætasköpun HS Orku mögulega. Samsetning aðfangakeðju HS Orku ræðst af verkefnastöðu, viðhaldsverkefnum og nýframkvæmdum fyrirtækisins á hverjum tíma.
Til að ná árangri í sjálfbærni skiptir máli að frammistaða birgja í virðiskeðjunni samræmist áherslum HS Orku. Árið 2023 sá íslenska matsfyrirtækið Reitun um að framkvæma ítarlegt sjálfbærnimat á tíu lykilbirgjum HS Orku og var það í fyrsta sinn sem þriðji aðili er fenginn til slíkra úttekta. Árið 2024 lét HS Orka gera úttekt á frammistöðu tíu íslenskra birgja til viðbótar, auk þess sem árangur tveggja erlendra birgja fyrirtækisins var greindur af erlenda matsfyrirtækinu EcoVadis. Í árslok 2024 voru tæp 69% af heildarinnkaupum fyrirtækisins við fyrirtæki með virkt sjálfbærnimat.
