HS Orka hefur nú annað árið í röð undirgengist heildstætt sjálfbærnimat matsfyrirtækisins EcoVadis og hækkar einkunnin milli ára. HS Orka er í hópi þeirra fyrirtækja á heimsvísu sem koma best út í matinu. EcoVadis er leiðandi fyrirtæki á alþjóðavettvangi í úttektum á frammistöðu fyrirtækja í sjálfbærni.
Eftirtektarverður árangur
HS Orka viðheldur EcoVadis gullvottun sem fyrirtækið hlaut í fyrra og er nú í hóp þeirra 5% fyrirtækja á heimsvísu sem koma best út í mati EcoVadis í ár en samtals er um að ræða yfir 100 þúsund fyrirtæki vítt og breytt um heiminn.
HS Orka fékk að þessu sinni hærri heildareinkunn en á síðasta ári og nemur hún nú 84 af hundraði en var áður 76 af hundraði. Þessi átta stiga hækkun á einkunn er sérstaklega athyglisverð í ljósi þess að EcoVadis eykur kröfur sínar á hverju ári og krefst það stöðugrar vinnu að viðhalda fyrri einkunn og hækka hana.
Í hópi þeirra bestu
Fyrirtæki sem eru á meðal þeirra 1% sem koma best út í mati EcoVadis hljóta platínuvottun en það er hæsta vottun sem EcoVadis veitir. Í því samhengi má benda á að ef nánar er rýnt í einkunnagjöf HS Orku er fyrirtækið komið í hóp efstu 2% fyrirtækja sem koma best út í mati EcoVadis á heimsvísu og er þar með að færast nær platínuvottun EcoVadis.
Styrkleikarnir liggja víða
Styrkleikar HS Orku í sjálfbærni liggja áfram á sviði umhverfismála, vinnuverndar og mannréttinda en verulegar framfarir hafa sést á þessum og öðrum sviðum sem EcoVadis metur. Þetta endurspeglar áframhaldandi áherslu fyrirtækisins á skýrar stefnur og aðgerðir í þágu umhverfis- og öryggismála, vinnuverndar og eflingar mannauðs.
