Borun fyrstu djúpu rannsóknarborholunnar við Sveifluháls í Krýsuvík hófst í apríl 2025 en borunin er hluti af jarðhitarannsóknum HS Orku á Krýsuvíkursvæðinu. Öllum yfirborðsrannsóknum er lokið og nú standa yfir rannsóknir með djúpborun.Krýsuvíkursvæðið hefur hingað til verið metið hátt sem jarðhitasvæði til nýtingar fyrir orkuvinnslu. Vonir standa til þess að framleiða þar heitt vatn fyrir Hafnarfjörð og höfuðborgarsvæðið og rafmagn inn á landskerfið. Fyrirtækið Jarðboranir sér um verklega hluta borunarinnar og nýtir til þess borinn Óðin. Borinn er knúinn rafmagni  þannig að boruninni fylgir ekki olíunotkun til að knýja aflvélar hans að undanskildum fyrstu vikunum, þar til ný spennistöð er komin í gagnið.