Akihiro Nishimura, umhverfisráðherra Japans, heimsótti höfuðstöðvar HS Orku í Svartsengi síðdegis á þriðjudag og kynnti sér starfsemi fyrirtækisins. Með í för voru einnig Ryotaro Suzuki, sendiherra Japans á Íslandi, ásamt embættismönnum japanska umhverfisráðuneytisins.
Tómas Már Sigurðsson, forstjóri HS Orku, kynnti fjölbreytt verkefni fyrirtækisins og ræddu þeir ráðherrann um áskoranir og tækifæri sem blasa við á sviði nýtingar endurnýjanlegra orkugjafa. Að fundi loknum skoðaði hópurinn orkuverið í Svartsengi og kynnti sér framkvæmdir sem hafnar eru við stækkun orkuversins.
Framkvæmdirnar miða að því auka afkastagetu og bæta nýtingu auðlindarinnar í Svartsengi. Túrbínur og ýmiss tækjabúnaður sem fyrir er í orkuverinu kemur meðal annars frá japanska fyrirtækinu Fuji og á það sama við um tækjabúnaðinn sem settur verður upp á næstunni.
Japanir sýna jarðhitanýtingu Íslendinga mikinn áhuga enda eiga löndin tvö það sameiginlegt að geta nýtt jarðhita til orkuvinnslu og hafa leiðtogar þjóðanna rætt um aukið samstarf þeirra á sviði nýtingar á hreinni orku.
Ráðherrann fór af landi brott í morgun en auk heimsóknarinnar til HS Orku fundaði hann með Guðlaugi Þór Þórðarsyni, umhverfis-, orku- og loftslagsráðherra, og skoðaði Gullfoss, Geysi og Þingvelli.
Nishimura tók við embætti umhverfisráðherra í fyrra en hann var fyrst kjörinn á þing árið 2003 og hefur því setið á japanska þinginu í tvo áratugi.
