Alls hlutu 15 verkefni styrk úr síðari úthlutun Samfélagssjóðs HS Orku á þessu ári en úthlutað er úr sjóðnum að vori og hausti. Rúmlega hundrað umsóknir bárust að þessu sinni og hafa þær aldrei verið fleiri. Samtals er úthlutað um tíu milljónum króna á ári úr sjóðnum.
Sjóðurinn styður við verkefni sem hafa jákvæð áhrif á samfélag, lífsgæði og mannlíf og er sérstök áhersla lögð á verkefni í nágrannabyggðum starfsstöðva HS Orku, sem hafa skírskotun til heimsmarkmiðanna sem HS Orka hefur innleitt.
Verkefnin sem hljóta styrk að þessu sinni snúa meðal annars að íþrótta- og félagsstarfi barna, björgunar- og neyðarstarfi, menningu og tónlist. Þau eru:
• Körfuboltaæfingar fyrir börn með sérþarfir – UMFN
• Strákar spjalla saman – Barnaheill
• 10 ára afmæli Vestra - Íþróttafélagið Vestri
• Styrkur til íþróttaiðkunar barna á Íslandi - Minningarsjóður Ölla
• Endurnýjun á straumvatnsbúnaði - Björgunarsveit Biskupstungna
• Unglinga- og nýliðastarf - Slysavarnadeildin Þorbjörn
• Búnaður og uppsetning - Verzlunarfjelag Árneshrepps
• Foreldrastuðningur - Áróra Huld Bjarnadóttir
• Búnaður til aðstoðar börnum með einhverfurófsraskanir og fjölþættar sérþarfir – Myllubakkaskóli
• Gróðursetning trjáa frá Skarðshlíð og Völlum að Hvaleyrarvatnssvæðinu - Skógræktarfélag Hafnarfjarðar
• Tónleikar fyrir lokaðar alzheimersdeildir – Elligleði
• Landsmót íslenskra kvennakóra í Reykjanesbæ 2026 - Kvennakór Suðurnesja
• Dagur í lífi fatlaðs fólks - Átak, félag fólks með þroskahömlun
• Efling félagsstarfs í Vogum - Félagsmiðstöðin Boran
• Leikjavæðing Barnaspítala Hringsins - Þykjó ehf.
Með styrkveitingunum vill HS Orka styðja við framúrskarandi og fjölbreytt verkefni sem hafa jákvæð áhrif á nærsamfélagið og stuðla að sjálfbærari framtíð.
Næsta úthlutun fer fram í maí og verður opið fyrir umsóknir í gegnum umsóknarsíðu HS Orku frá 1-30. apríl 2026. Allar nánari upplýsingar um sjóðinn og úthlutunarviðmið má einnig finna þar.
