Stækkað og endurbætt orkuver HS Orku í Svartsengi hlaut í dag Teninginn, viðurkenningu Verkfræðingafélags Íslands fyrir framúrskarandi verkefni eða framkvæmd. Viðurkenningin var afhent við hátíðlega athöfn á Degi verkfræðinnar á Hilton Reykjavík Nordica.
Allar áætlanir stóðust
Framkvæmdir við orkuverið voru hafnar áður en jarðhræringar hófust á Reykjanesskaga og fóru þær því að stórum hluta fram á tímum mikilla umbrota og endurtekinna eldgosa á svæðinu. Þrátt fyrir erfiðar aðstæður, tímabundnar lokanir vinnusvæðis og áskoranir vegna gasmengunar tókst að ljúka verkefninu samkvæmt upphaflegri tímaáætlun og undir kostnaðaráætlun með samhentu átaki þeirra fjölmörgu aðila sem komu að verkinu.
Framkvæmdin fól í sér uppsetningu nýrrar 55 MW vélasamstæðu sem jafnframt er stærsti gufuhverfill landsins. Með verkefninu voru tvö eldri orkuver í Svartsengi leyst af hólmi og um leið ráðist í umfangsmiklar endurbætur á búnaði sem tengist bæði raforkuframleiðslu og heitavatnsframleiðslu.
Liður í sjálfbærni og orkuöryggi samfélagsins
„Í uppbyggingu sjöunda orkuversins í Svartsengi kemur saman verkfræðileg þekking, tæknileg nýsköpun og reynsla í nýtingu jarðvarma sem hefur styrkt mikilvæga orkuinnviði á Reykjanesi við krefjandi aðstæður náttúrunnar,“ segir meðal annars í umsögn dómnefndar.
„Verkefnið er því mikilvægt framlag til sjálfbærrar nýtingar jarðvarma og aukins orkuöryggis á Íslandi. Virkjunin gegnir jafnframt lykilhlutverki í orku- og hitaveituinnviðum á Reykjanesi og hefur þar með mikla þýðingu fyrir samfélag og atvinnulíf á svæðinu.“
Samvinna, reynsla og útsjónarsemi fjölmargra
Að verkefninu komu ráðgjafar, verktakar og sérfræðingar úr ólíkum greinum verkfræði. „Verkefnið sýnir vel hvernig verkfræðiþekking, skipulag og samvinna geta tryggt áframhaldandi uppbyggingu mikilvægra innviða jafnvel á tímum náttúruhamfara. Samvinna þeirra, ásamt reynslu og útsjónarsemi við úrlausn verkefna við krefjandi aðstæður, var lykilatriði í farsælli framkvæmd,“ segir jafnframt í umsögn dómnefndar.
