Nýjustu niðurstöður Íslensku ánægjuvogarinnar sýna að ánægja viðskiptavina HS Orku hefur aukist verulega milli ára. HS Orka er eina raforkusölufyrirtækið í mælingunni sem mælist með marktæka hækkun frá fyrra ári og situr nú í öðru sæti meðal raforkusala. Þetta er ánægjuleg niðurstaða ekki síst í ljósi krefjandi ytri aðstæðna hjá fyrirtækinu á síðasta ári.
Íslenska ánægjuvogin er hlutlaus og samræmd mæling sem gerir fyrirtækjum kleift að fylgjast með þróun ánægju viðskiptavina milli ára og í samanburði við helstu samkeppnisaðila.
Endurbættar lausnir fyrir viðskiptavini
Rekstrarumhverfi orkufyrirtækja hefur verið krefjandi undanfarin ár og breytingar á markaði hafa haft veruleg áhrif á bæði þjónustu og samskipti við viðskiptavini. HS Orka hefur á þeim tíma lagt áherslu á endurbættar lausnir fyrir viðskiptavini, þar á meðal skýrari gjaldskrár, aukinn sveigjanleika og nýja valmöguleika, sem gera viðskiptavinum kleift að stýra raforkunotkun sinni með einfaldari hætti.
Fagleg og yfirveguð viðbrögð
HS Orka hefur gegnt mikilvægu hlutverki í tengslum við náttúruhamfarir og eldsumbrot á Reykjanesskaganum á liðnum tveimur árum og hefur fyrirtækið lagt áherslu á ábyrga upplýsingagjöf, öryggi og samfellu í þjónustu. Fagleg og yfirveguð viðbrögð við slíkum aðstæðum skipta miklu máli fyrir traust og upplifun viðskiptavina.
Speglar metnað starfsfólks og þjónustulund
HS Orka telur niðurstöðu mælinga ánægjuvogarinnar nú spegla vel sameiginlegt átak starfsfólks fyrirtækisins og þann metnað sem lagður er í að þróa þjónustu og stafræna upplifun í takt við þarfir viðskiptavina. Jafnframt er árangurinn hvati til áframhaldandi umbóta og stöðugrar þróunar til framtíðar. Endurmörkun fyrirtækisins, sem kynnt var í lok síðasta árs, er hluti af þeirri vegferð.
