Starfsemi HS Orku í Svartsengi er með eðlilegum hætti en eldgos hófst við Sundhnúkagíga á Reykjanesi skammt frá Svartsengi laust upp úr kl. 22 í gærkvöldi. Neyðarstig er í gildi. Vaktmenn HS Orku eru á svæðinu en segja engar breytingar merkjanlegar í gufuholum og sýnatökur eru sömuleiðis eðlilegar. Fylgst er náið með vatnsgæðum í framleiðslunni og verður sýnatökum fjölgað í kjölfar eldgossins. Allt kapp er nú lagt á viðbúnað og varnir lagna fyrir heitt og kalt vatn frá Svartsengi vegna mögulegs hraunflæðis.
Enn fjarstýrt frá Reykjanesvirkjun
Orkuverið í Svartsengi var mannlaust við upphaf gossins og er allri framleiðslu orkuversins stýrt frá Reykjanesvirkjun. Neyðarstjórn HS Orku er á vaktinni og fylgist grannt með framvindu mála og undirbýr nauðsynlegar aðgerðir komi til þess að hraunrennsli ógni innviðum í og við Svartsengi. Reglulegt samráð er við neyðarstjórn HS Veitna vegna dreifikerfisins og er staðan metin á hverjum tíma og viðbragð fyrirtækjanna samræmt.
Dregur úr virkni
Verulega hefur dregið úr krafti gossins frá því í gærkvöldi. Hraunflæðið er þó orðið tvöfalt umfangsmeira en í síðasta gosi við Litla Hrút. Staðsetning gossprungunnar er talin nokkuð heppileg með tilliti til byggðar í Grindavík og innviða í Svartsengi enn sem komið er. Meginhraunstraumurinn rennur í austur og svo til norðurs.
Vinnu við varnargarðana við Svartsengi er nánast lokið og einungis lítill frágangur eftir. Verktakar eru þar að störfum en gert var hlé á vinnunni í nótt. Skörð eru í görðunum þar sem lagnir liggja um en jarðefni er til reiðu ef loka þarf skörðunum með litlum fyrirvara. Búið er að þrengja opnunina á garðinum við Grindavíkurveg en sú umferð, sem almannavarnir heimila, kemst þó greiðlega í gegn að svo stöddu.
Viðbragsáætlanir til reiðu
Helsta ógnin sem steðjar að á þessu stigi er sú ef hraun tekur að renna að kaldavatnsfæðingu að og frá orkuverinu og að Njarðvíkuræðinni,sem er heitavatnslögnin til Reykjanesbæjar. Unnið er samkvæmt viðbragðsáætlun þeirrar sviðsmyndar að hraun fari yfir þessa innviði. Kortlagt verður hvaða kafla er unnt að verja strax í samráði við almannavarnir. Tæknilegur undirbúningur til varnar Njarðvíkuræðinni hefur staðið yfir síðustu vikur og er til skoðunar að grafa hana að hluta í jörðu. Framkvæmdir við niðurgröft eru ekki hafnar. Talið er að það taki að lágmarki átta vikur að grafa lögnina niður.
