Eldgos hófst við Stóra Skógfell við Sundhnúksgígaröðina kl. 23:14 í gærkvöld. Gosið er hið sjöunda í röð eldgosa á gígaröðinni frá því í desember á síðasta ári. Hraunrennslið hefur tekið Svartsengislínu út og fer heitavatnsframleiðsla fyrir Suðurnesin nú fram með varaaflsvélum í Svartsengi. Útleysing varð í Reykjanesvirkjun þegar Svartsengislína leysti út í morgun vegna hraunrennslis. Reykjanesvirkjun er nú aftur komin inn á net.
Dregið hefur úr virkni gossins en hraunrennsli hefur náð að Njarðvíkuræðinni, heitavatnslögninni frá Svartsengi til Fitja í Reykjanesbæ. Lögnin liggur í jörðu á þeim kafla þar sem hraun rennur og er talið að hún sé vel varin. Ef svo fer að hún rofnar er viðgerðarefni tiltækt og miðast allt viðbragð við að hraða viðgerð sem mest má.
Neyðarstjórn HS Orku er að störfum. Athafnasvæði fyrirtækisins í Svartsengi var rýmt um leið og viðvaranir bárust um yfirvofandi gos. Jarðvarmaverinu í Svartsengi er nú fjarstýrt frá Reykjanesvirkjun en starfsemi orkuveranna hefur verið að mestu með eðlilegum hætti til þessa í atburðinum, líkt og í fyrri eldgosum.
Viðvörun barst úr borholuvöktunarkerfi HS Orku tæpum hálftíma áður en eldgosið hófst. Fylgst er grannt með þróun hraunrennslis úr sprungunni ásamt gasmengun á svæðinu.
Íbúar eru beðnir að fylgjast vel með upplýsingum á vefsíðum og samfélagsmiðlum almannavarna og orku- flutnings- og veitufyrirtækjanna HS Orku, HS Veitna og Landsnets ef breytingar verða á stöðu innviða á Reykjanesinu. Einnig er minnt á ábendingar vegna náttúruhamfara sem finna má hér.
