Borholur Svartsengi
Boranir fyrir jarðhitaleit í Svartsengi hófust undir lok árs 1971. Hola 1
varð 262 m djúp, en hiti í holunni reyndist vera kringum 37°C og var vatn úr
henni því notað sem skolvatn fyrir borun næstu holna. Holan er staðsett þar
nærri sem tilraunaverksmiðja CRI rís. Næstu tvær holur voru boraðar í byrjun
árs 1972 á því svæði sem mátt hefur síðustu ár sjá gufu stíga upp af. Dýpri
holan varð 402 m djúp og náði því rétt niður í hið eiginlega jarðhitakerfi í
Svartsengi. Hiti í holunni varð yfir 215 °C og aðeins lægri í grynnri
holunni. Þessar holur staðfestu tilvist jarðhitakerfisins í Svartsengi og
háan hita þess. Aðrar tvær holur voru boraðar tveim árum síðar djúpt í
jarðhitakerfið (1713 m) og höfðu því alls 5 holur verið boraðar þegar
Hitaveita Suðurnesja hóf vinnslu á svæðinu seinni hluta árs 1976. Næstu 6
árin bættust við 6 borholur og aðeins byrjað á 13. holunni en hún var aldrei
kláruð. Á sama tíma jókst framleiðsla á heitu vatni, byrjað var að framleiða
rafmagn og hætta varð notkun á eldri holum vegna skemmda á fóðringum. Hlé
varð á borunum til 1993 er næstu tvær holur bættust við. Skömmu fyrir og
kringum síðustu aldamót voru svo boraðar 6 holur samfara stækkun orkuversins
fyrir aukna rafmagnsframleiðslu (30 MWe). Á sama tíma var náð tökum á
niðurdælingu sem jókst næstu árin. Fyrir frekari aukningu á
rafmagnsframleiðslu voru boraðar 3 holur árið 2008 og höfðu þá verið boraðar
alls 24 holur í Svartsengi.
Borholur Svartsengi.
Borholur Reykjanesi
Aðrar borholur