Sýningin - Orkuverið Jörð

 

Gagnvirk sýning í Reykjanesvirkjun.
Á árinu 2006 skrifaði Hitaveita Suðurnesja hf. undir samninga við List og saga ehf. og Janvs international vegna hönnunar og smíði á sýningunni Orkuverið Jörð eða Powerplant Earth.  Sýningin hefur nú verið sett upp í stöðvarhúsi Reykjanesvirkjunar.  Hönnun og hugmyndafræði sýningarinnar gengur út frá stóra hvelli og upphafi sólkerfisins allt aftur til okkar tíma.  Farið er meðal annars  í gegnum uppfinningar sem breytt hafa lífi okkar til þess vegar sem það er í dag en það ætti að vera okkur öllum ljóst hversu mikilvægur þáttur orkan er í lífi okkar.  Fjallað verður um mismunandi orkunýtingu á jörðinni og hvaða möguleika við höfum á orkunýtingu bæði hér heima á Íslandi sem og annars staðar í heiminum.  Nokkur sýnishorn eru á staðnum en segja má að jarðvarmavirkjunin sjálf sé eitt það stærsta.  Sýningin er að nokkrum hluta gagnvirk og geta gestir því tekið virkan þátt í henni.   

Nánar um efnistök Orkuversins Jörð.

Upphaflega er Orkuverið Jörð hugarfóstur aðstoðarforstjóra Hitaveitu Suðurnesja hf, Alberts Albertssonar.  Sýningin hefur síðan verið hönnuð af Janvs International í London og Ara Trausta Guðmundssyni sem sá um að semja texta sýningarinnar.  Á spjöldum og gagnvirkum skjám er að finna ógrynni upplýsinga um orku, plánetur og himingeiminn.  Nokkur gagnvirk tæki er að finna á sýningunni þar á meðal jarðskjálftahermir þar sem sýningargestir geta upplifað raunverulega jarðskjálfta á mismunandi richterskala.  

Plánetu ratleikur um Reykjanesið.Fyrir utan stöðvarhús virkjunarinnar, hálfgrafin í hrauninu er sólin staðsett en hinar plánetur sólkerfisins eru staðsettar víðsvegar um Reykjanesskagann í hlutfallslega réttri fjarlægð frá sólinni við Reykjanesvirkjun og hlutfallslega réttri stærð við hana alla leið til Reykjanesbæjar þar sem síðasta og minnsta plánetan er. Þar af leiðandi er upplagt að fara í skemmtilegan ratleik um skagann í tengslum við plánetur sýningarinnar.

Frá og með 7 september 2009 til 15 maí 2010 verður sýningunni lokað.

    Eingöngu verður tekið á móti hópum samkvæmt samkomulagi.

 Vinsamlega hafið samband í síma 436 1000

Veist Þú –

• hversu mikil orka fer í að hita vatn í tebolla?
• Hversu margar pláneturnar eru í sólkerfinu okkar?
• Hvað þær heita og hvernig ætli sé að vera þar?
• Hversu mikla orku þurftir þú til að ferðast til orkuversins?