Markmið HS Orku hf er að tryggja að vinnustaðurinn einkennist af fagþekkingu, verkkunnátta, þjónustulund, starfsgleði, heiðarleika og gagnkvæmri virðingu. Möguleikar til að ná fram settum markmiðum byggjast fyrst og fremst á því að fyrirtækið hafi yfir að ráða hæfu, áhugasömu og vel menntuðu starfsfólki, sem getur axlað ábyrgð og sýnt frumkvæði í starfi, brugðist við síbreytilegum þörfum og geti þannig tekið virkan þátt í framþróun fyrirtækisins. Einnig að fyrirtækið leggi metnað sinn í að hlúa vel að sínu starfsfólki til að viðhalda starfsánægju og góðum starfanda.

1. Hlutverk starfsmanna og stjórnenda

   Er að veita bestu þjónustu hverju sinni og vera reiðubúið að takast á við dagleg, ný og breytt verkefni. Stjórnendum ber að tileinka sér góða og nútímalega stjórnunarhætti, sem meðal annars felast í að laða fram og efla frumkvæði, kennsluhæfileika, almennan félags- og persónuþroska starfsmanna. Þeir skulu jafnan leitast við að hafa samráð við starfsfólk sitt um málefni er það varðar og beita sér fyrir sem víðtækastri sátt um þau ásamt því að viðhalda virku upplýsingastreymi.

2. Jafnréttismál

   Sjá jafnréttisáætlun HS Orku

3. Starfsþróun og símenntun

   HS Orka hf hyggst fylgja eftir starfsþróun starfsmanna að því marki sem hún getur orðið bæði starfsmanninum og fyrirtækinu til gagns. Starfsþróun er ekki einhliða aðgerð starfsmanns eða stjórnanda. Hún er á ábyrgð beggja og er hluti af þátttöku starfsmanns í starfsmannasamtölum, símenntun, tilflutningi í starfi, breytingu á starfi og samvinnu. HS Orka hf gefur starfsmönnum kost á símenntun innan sem utan stofnunarinnar til að auka þekkingu sína og faglega hæfni sem nýtist í starfi.

4. Starfsmannasamtöl/viðtöl

   HS Orka hf stefnir á að komið verði á reglulegum starfsmannasamtölum/viðtölum. Hagsmunir starfsmanna og fyrirtækisins mætast í uppbyggjandi samtölum þar sem gagnkvæmar kröfur og væntingar koma fram hjá hvorum tveggja.

5. Starfið og fjölskyldan

   HS Orka hf leitast við að skapa starfsmönnum sínum aðstæður til að samræma kröfur starfs- og fjölskylduábyrgðar eins og kostur er. Starfsmönnum skal einnig gert kleift að minnka við sig vinnu tímabundið vegna fjölskylduábyrgðar eins og til dæmis umönnunar barna og sjúkra fjölskyldumeðlima eftir því sem aðstæður leyfa hverju sinni. Ennfremur skal þess gætt að yfirvinnu sé haldið innan hóflegra marka.

6. Ráðning og starfslok

   HS Orka hf leitast ávallt við að ráða sem hæfustu starfsmenn til starfa. Allir umsækjendur hafa jafnan rétt til vinnu og ráðningar byggjast á hæfileikum, menntun og reynslu þess sem ráðinn er og hæfni viðkomandi til að inna starfið vel af hendi. Við ráðningar skal ávallt hafa hliðsjón af gildandi jafnréttisáætlun. Gengið skal frá ráðningum með ráðningasamningi. HS veitir nýjum starfsmönnum sem koma til starfa, grunnþekkingu og fræðslu um helstu þætti fyrirtækisins og starfsfræðslu eftir því sem við á hverju sinni. Starfsreglur HS Orku hf kveða á um að starfsmenn láti af störfum eigi síðar en í lok þess mánaðar sem þeir verða 70 ára. Þegar starfsmenn láta af störfum, hvort sem er vegna aldurs eða annarra orsaka, skal þeim standa til boða viðtal við starfsmannastjóra eða/og yfirmann meðal annars um líðan í starfi, ástæður starfsloka og fleira.

7. Öryggismál og vinnuvernd

   HS Orka hf leggur metnað sinn í að öryggismál séu í hávegum höfð og er starfandi virk öryggisnefnd innan fyrirtækisins.

8. Starfskjör

   HS Orka hf tekur tillit til ábyrgðar, frammistöðu og árangurs við ákvörðun kjara, til þess að geta laðað að og haldið sem hæfustu starfsfólki.

9. Viðvera og vinnutími

   Starfsmönnum er ætlað að sinna skyldum sínum á umsömdum vinnutíma og mæta stundvíslega til starfa.

10. Samskipti og siðareglur

    Starfsmenn sýni samstarfsmönnum sínum og öðrum tilhlýðilega virðingu, umburðarlyndi og jákvætt viðmót sem viðheldur og endurspeglar góðan starfsanda. Ummæli, tjáning eða atferli starfsmanns gagnvart öðrum sem ógnar, truflar eða ögrar og veldur óþægindum verður ekki liðið. Starfsmenn skulu gæta fyllsta trúnaðar um þau málefni sem þeir verða áskynja í starfi sínu varðandi starfsemi HS Orku hf og viðskiptavini.

11. Heilbrigði

    HS Orka hf hvetur og styrkir starfsfólk sitt fjárhagslega til að leggja rækt við eigin heilsu og ástunda heilbrigt líferni. HS Orka hf veitir starfsmönnum leiðbeiningar og aðstoð til að vinna úr vandamálum svo sem misnotkun vímuefna. Vinnustaðir HS Orku hf eru reyklausir.